මිහිනතලය පුදබිමේ සිටි හමුදා නිලධාරීන් ඉවත් කිරීම තුළින් පුදබිමේ ආරක්ෂාවට කිසිදු තර්ජනයක් නොමැති බව ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකෝන් මහතා පවසයි.
අද (11) පාර්ලිමේන්තුවේ දී පැනයක් යොමු කරමින් පාර්ලිමේන්තු මන්ත්‍රී රොෂාන් රණසිංහ මහතා පවසා සිටියේ, මිහිනතලේ සංවර්ධන කටයුතු සිදුකරමින් සිටි හමුදා නිලධාරීන් ඉවත් කර ඇති බැවින් එහි සංවර්ධන කටයුතු ඇනහිටී ඇති බවය.
එසේ සිදුනොකර ඉදිරියටත් එම සංවර්ධන කටයුතු පවත්වාගෙන යෑමට කටයුතු කරන ලෙස ද මන්ත්‍රීවරයා මෙහිදී ඉල්ලා සිටියේය.
එයට පිළිතුරු දුන් රාජ්‍ය අමාත්‍යවරයා,
“252 දෙදෙනා ඉවත් කරගැනීම තුළින් පුදබිමේ ආරක්ෂාවට කිසිම හානියක්, බාධාවක් නෑ. ඔවුන් සියලුදෙනාම යොදවලා තිබුණේ ආරක්ෂක කටයුතු වෙනුවෙන් නෙමෙයි. ආරක්ෂාව සැපයුවේ පොලීසියෙන්. පොලීසියේ 30ක පමණ ප්‍රමාණයක් එම ස්ථානයේ ඉන්නවා. එකේ කිසිම ඉවත් කිරීමක් කරලා නෑ. පුදබිමේ ආරක්ෂාව සම්බන්ධයෙන් වගකීම ශ්‍රී ලංකා පොලීසිය භාරගෙන තියෙනවා. අවශ්‍යතාවයක් තියෙනවා නම් හමුදාව හෝ වෙනත් අය ලබාදෙන්න පුළුවන්.”