ජාත්‍යන්තර මූල්‍ය අරමුදල සමඟ කාර්ය මණ්ඩල මට්ටමේ එකඟතාවකට ඉක්මනින් එළැඹිය හැකි බව මුදල් රාජ්‍ය අමාත්‍ය ශෙහාන් සේමසිංහ පවසයි.
සිය ට්විටර් ගිණුමේ සටහනක් තබමින් මුදල් රාජ්‍ය අමාත්‍යවරයා පෙන්වා දෙන්නේ, මොරොක්කෝවේ පැවති ජාත්‍යන්තර මූල්‍ය අරමුදලේ සහ ලෝක බැංකු වාර්ෂික රැස්වීම්වල දී මෙරට ආර්ථික ප්‍රකෘතිය සහ තිරසරභාවය පිළිබඳ දීර්ඝ වශයෙන් සාකච්ඡා වූ බවයි.
එම කටයුතු වේගවත් කිරීමට අවශ්‍ය සහයෝගීතාව වැඩි කරගැනීම සඳහා එම සාකච්ඡාවල දී ප්‍රමුඛත්වය ලැබුණු බව ශෙහාන් සේමසිංහ රාජ්‍ය අමාත්‍යවරයා පවසයි.
මේ අතර, විදේශීය ණය ප්‍රතිව්‍යුහගත කිරිමේ වැඩපිළිවෙළ ද මේ වන විට බොහෝ දුරට අවසන් අදියරට පැමිණ ඇති බව රාජ්‍ය අමාත්‍යවරයා පවසයි.
බ්ලූම්බර්ග් වෙබ් අඩවිය සමඟ පැවති සාකච්ඡාවක දී ශෙහාන් සේමසිංහ රාජ්‍ය අමාත්‍යවරයා පෙන්වා දී ඇත්තේ, චීනය ඉන්දියාව පැරිස් සමාජය සහ විදේශීය බැදුම්කර හිමියන් වෙත ගෙවිය යුතු ණය ප්‍රතිව්‍යුහගත කිරීම සඳහා කොන්දේසි එකඟ කරගැනීමට අවශ්‍ය අවසන් සාකච්ඡා සිදු වෙමින් පවතින බවයි.
චීන එක්සිම් බැංකුව සමඟ තාවකාලික කොන්දේසිවලට එකඟ වීමෙන් පසු මේ වන විට අවධානය යොමු ව ඇත්තේ, සියයට 20ක කප්පාදුවක් සහ නව යෝජනා ඉදිරිපත් කළ අනෙකුත් නිල ණය හිමියන් සමඟ සාකච්ඡා කර එකඟතාවකට පැමිණීම බව ඔහු වැඩිදුරටත් සඳහන් කර තිබේ.